مرد مڑاه داریں په مَڑاه مـُرتاں
دپتراں راج ءِ نام دار بیتاں
دائمی زند و په وشیں باندات ءَ
مرگ ءِ گوں امبازاں ، گور ءَ رُپتاں
بے دل و دَپ چَٹیں نگن پنڈاں
دژمن ءِ دست ءَ وَش مهار بیتاں
په چرپیں چانیگ و زَر ءِ هوشام ءَ
مَرکب ءَ شیطان ءِ سوار بیتاں
ڈالر و نوٹ و ووٹ ءِ شوهاز ءَ
میر و سردار ءِ ربـّـال یار بیتاں
دیم ءِ ٹـِک چــِت گوں باجوی کرداں
دُژمن ءِ دمب ءَ گوں هوار بیتاں
مات ءِ ربـّال ءَ بے بُنیں زردار
دُژمن ءِ پَوج ءِ راهچار بیتاں
سارت و هونکیں ساهگ وش کـُوشیں
په منا سوچوکیں لوار بیتاں
هون منی راج ءِ سرمچارانی
تـِلملیں بامسار ءَ هوار بیتاں
چاپ و چَوگان انت صوبه خانانی
بے دلیں روباه نرمزار بیتاں
پیر کوه سوراپ سهر چَکیں مُرگاپ
لاش شهیدانی مرت و مار بیتاں
آشوب ءِ مستاگ سوب گوربام ءِ
هانـُل ءِ جیگ ءِ پُل و هار بیتاں
دروهیت حسن دوستین ءَ گلیں مریم
( بلے ) میر تلانگ لجـّانی میار بیتاں
نام ئی درپشیت ماں دپتراں راج ءِ
بے دل ءِ پیشانیگ ءِ سگار بیتاں
+ نوشته شده در چهارشنبه بیست و دوم آذر ۱۳۹۱ ساعت 12:2 توسط احمــــــــــد
|